Blog honetako zati batzuk http://wukrora.mundua.com blogetik hartu ditugu. Bertan hasi ginen 2007ko udan igarotako ia bi hilabetetako esperientzia kontatzen. Hilabete batzuen ostean, klaseko lana zena amaitu eta pixkanaka idazteari utzi genion baina Wukroko lagunen oroitzapena eta bidaiaren esperientzia amaigabea da oraindik. Blog honetarako edukiak igotzeko asmoz istorio batzuk kopiatu eta beste batzuk sortuko ditugu, zuen gustokoak izango direlakoan eta zuen bidaien berri ere jakiteko gogoz.
WUKRORA beraz, Etiopiako Tigray eskualdean dagoen herritxo batetara, joan ginen 2007ko udan. Afrikako Aita Zurien misioa dago bertan, non umezurtzen proiektu bat eramaten den aurrera. Bertan igaro genituen bi hilabete, 18 eta 19 urte bete berriak genituela.
Uztailaren 11ean abiatu ginen bertarantz, eta irailaren 1a bitartean sekulako esperientzia berri pila izan genituen. Kultura, pentsaera, balio edo nolabait esateko lagun eta bizimodu ezberdinak ezagutu ahal izan genituen, guregan asko eragin dutenak.
Bi helbururekin joan ginen bertara, baina helburu horiek beste ikuspuntu bat hartzen dute bertara iristean. Hemengo planteamentuek ez dute 3.munduan balio. Beraz, ingeles klaseak emateko helburuari eta grabaketa batzuk egitekoari, beste milaka zeregin gehitu genizkion, oraindik ere ahaztu ezin ditzakegunak.
Esan bezala, blog honen bitartez, Wukrora bidaiatzera gonbidatu nahi dugu hau irakurtzera animatzen den edonor guk bizi izan ditugun milaka istorio eta egoera irakurri ahal izango ditu eta.
Besterik gabe,
Leire Ferro eta Marta Gaztañaga
